A multipremiada curtametraxe Tout le monde aime le bord de la mer/ A todos nos gusta a beira do mar é a ópera prima da cineasta galega Keina Espiñeira, que recrea recrea a espera en Ceuta de tres inmigrantes africanos, Diakité, Aliou y Boubacar, a seren trasladados ao continente europeo. Seleccionada e premiada en multitude de festivais internacionais, a obra foi seleccionada polo xurado do 45 festival de cine de Rotterdam entre as quince finalistas que competiron como as mellores curtametraxes do continente nos Premios do Cine Europeo (EFA) do ano 2016.
Fotograma da curtametraxe
A película, unha mestura entre ficción e documental, reflicte un limbo espazo-temporal no que agardan os seus protagonistas. A directora estaba interesada en “retratar un territorio onde certas traxectorias quedan suspendidas no espazo-tempo. Os protagonistas son viaxeiros que se dirixen a Europa desde África, cando chegan a este lugar entran nunha espera incerta ata cruzar o mar. Na película explórase este limbo a través de paisaxes nómadas como son o bosque e o mar”.
A directora, despois de estudar ciencias políticias e comunicación audiovisual, está especiailzada no estudo das fronteiras e ten traballado como investigadora en California, Holanda, España e Marrocos.